Film subtitle edit dan!! - Lawnli Kaubawi

April 29, 2014

Film subtitle edit dan!!


Tun țum chu movie subtitle leh software sawi pawlh teh ang. A hmasa in post heading-ah hian 'Film subtitle edit dan!!' ka ti ve ngawt tak na chu film subtitle pêk chawp dân a ni dawn lo a nia. Hetia heading ka siam nachhan chu google search atan zawk a ni. TV, computer emaw mobile device-ah film kan en a, subtitle file .srt emaw a neih bawk chuan screen hnuailamah an thusawi a rawn lang țhin tih kan hria ang a. Heng subtitle file (.srt, .sub ...) țhenkhat te hi a chang chuan HAWRAWPPUI vekin a inziak țhin a, a chang chuan ri hriatna lama harsatna neite (Hearing Impaired) tana chhiar ve theih turin an dah tel bawk țhin. Chung subtitle ho ah chuan picture #1 a kan hmuh ang hian subtitle kan download tur file-ah 'beng lem' a lo awm ang a, website țhenkhat ah erawh chuan a thu in 'HI' tih ringawt a lo inziak bawk ang.



1
00:00:01,768 --> 00:00:09,608
[PROJECTOR CLICKING, D...]

2
00:00:09,610 --> 00:00:57,289
[TIRES SQUEAL]

3
00:00:57,291 --> 00:02:05,124
[MUSIC FADES SLOWLY...]

4
00:02:05,126 --> 00:02:26,945
[BEEPING AND CLICKING...]

5
00:02:26,947 --> 00:02:34,520
JAMES: NATHAN? TALK TO ME.
NATHAN: YES, TONIGHT.

Chung subtitle te chu hawrawppui veka a inziah emaw, 'HI' (hearing impaired) te tana inziak chunga TV a chhuah anih țhin hian mihring kan in an miau loh avangin tam tak tan chuan film en min ti tuilo tu pakhat a ni ve thei a ni.

Aw le, khing kan sawi te khi tunah chuan software hmangin en nuam zawk leh awlsam tak ni bawk siin dah (convert) i han tum teh ang. Subtitle file (.srt etc) hi Windows chhawm sa 'notepad' hmanga hawna edit chuan thu țhenkhat te chu 'Find & Replace' hmangin kan thlak thei mai ang a, entirnan a chunga subtitle kan hmuh ah khian "JAMES:" leh "NATHAN:" tih khi search-na tur ah kan dah ang a, replace-na turah engmah kan dah lo thung ang a, tichuan a film pumpuiah 'HI' te tana an ziah JAMES leh NATHAN te chu a awm tawh lo ang. Chutiang chiah chuan square brackets chhung [...] ami te pawh khi kan ti leh anga mahse line hnih/khat chauh brackets chhunga awm ho te erawh khi chu a paih thei thung ang! A chhan chu brackets chhung ah thu inang lo chi hrang hrang a awm tak vâng a ni.

Hetah chiah hian software tê leh zângkhai, thil tih theih ngah (powerful) bawk si, coder tam takin an hman ber NOTEPAD++ țangkaina a lo lang ta a ni. Tunah chuan sawi duah tawh lovin subtitle file, a bikin Hearing Impaired subtitle, en nuam zawkin i han edit/convert dawn teh ang.

A hmasa berin kan subtitle file edit tur chu read-only mode-ah a awm tur a ni lo: Right-click subtitle > Properties > Read-only.

Subtitle file chu kan right-click leh anga Edit with Notepad++ hmangin kan hawng ang a, a hmasa berin a chhunga thu te chu HAWRAWPPUI veka an lo awm chuan CTRL+A hmangin emaw Edit > Select All hmangin kan select vek hnuah kan right-click leh anga, 'lowercase' tih kan click hnuah subtitle pumpui chu hawrawptê ah an lo inthlak vek ang { Keyboard shortcut: CTRL+U }. [Pic #2]



A dawt leh ah chuan square brackets chhunga thu hrang hrang awm te hi a ruala kan paih vek dawn chuan Notepad++ feature pakhat 'regex' mode hmangin kan paih thei dawn a ni. Picture #3 ami ang hian kan 'find' tur laiah \[(.*?)\] hi kan dah anga, chumi hnuah cursor chu line no. 1-ah kan dah leh anga REPLACE ALL kan click hnuah chuan square brackets chhungah eng thu pawh awm se, subtitle pumpui ami chu seconds reilote chhungin a paih vek ang. [Pic #4]




Tin, subtitle țhenkhat ah chuan square brackets aiah brackets pangngai () an hman hun a awm anga:

2
00:00:09,610 --> 00:00:57,289
(tires squeal)

3
00:00:57,291 --> 00:02:05,124
(music fades slowly...)

chutiang anih erawh chuan kan regex hman \[(.*?)\] aiah hian \((.*?)\) hi hman leh mai tur a ni. (Regex hi ka man hleih theih thlawt loh avangin ka sawi zau thei bik lo a, a hman dân thiam tan chuan turu tak a ni! A hrechiang leh zir peih tan chuan google-ah en tur kan hmu țeuh awm e.)

Tikhan subtitle edit/convert chu kan zo ta a. Cable TV lama film playback țhin te pawh hian subtitle a ngai ngaia convert emaw play hnan tawp lovin, minute 1 chhung leka zawh vek theih anih bawk si avangin hetiang hian ti țhin ta ila, en a va nuam lehzual dawn em!.

3 comments:

© 2014 - 2019 Lalsangpuia Ralte. Powered by Blogger.