2017 - Lawnli Kaubawi

December 3, 2017

YouTube video monetize dawna hriattur pawimawh pakhat

YouTube a video upload hi sum siam nana hmang leh hman tum kan awm fur awm e. YouTube video monetize dan chu TS Khupchong in a blog-ah chiang taka a sawi tawh avangin sawi ka tum lova. Kan video upload kha YouTube lamin copyright material kan hman palh avangin monetize an lo phal lo thei a, tin an block daih theih bawk avangin sum siam nana hman an phal loh chhan zinga common ber kan video upload a music kan hman chungchang hi sawi ka tum ber chu a ni.

YouTube copyright detection (Content ID) technology hi a sâng hle a, video kan upload-ah copyright material chi hrang hrang mi music siamsa emaw, ṭawngka a ni emaw, lemziak a ni emaw, video clip emaw kan hmang anih chuan kan hmanna lai second leh minute zât thlengin a detect chat chat thei a, chung a detect te chu copyright neitute phalna pêk dân azirin monetize theih loh emaw, block emaw, monetize theih tho si a mahse sum insem (revenue share) tur ang zawngin an ti thei a ni.

A hnuaia screenshot hi en ila, kan video-ah 'Gangnam Style' lo hmang ve ringawt ta ila kan hmuh ang hian kan video chu sum siam nan kan hmang thei dawn lo a, 'Wiz Khalifa - See You Again (feat. Charlie Puth)' hla phei hi chu a hman theih loh bur tih kan hmu awm e.
Gangnam Style

Wiz Khalifa - See You Again (feat. Charlie Puth)

Kan video-ah tunlai hla lâr kan hmang ṭalh duh anih chuan YouTube Music Polices page-ah hian kan hla hman duh kha hman chi anih leh nih loh search hmasa ila a fuh awm e. Tin, YouTube hian kan video-ah duh ang tawka kan hman ngam tur Free Audio/Music Library an nei a, free library ami te hi kan hmang anih chuan video kan monetize thei a, mahse heng free music ho zingah pawh hian kan video description-ah a siamtute hming dah lan ngei phût an awm ve ṭhin tih erawh hre tel ila a ṭha awm e.
Free Music


I hun hlu tak senga min chhiarsak avangin ka lawm e.

November 19, 2017

Cable TV pechhuak tute pualin awlsam te a MKV file tih danglam dan
Cable TV pechhuak țhin tute harsatna pakhat chu an broadcast software hmanin video file play theih bik a nei țhin hi a ni awm e. Chûng play theih loh ho te chu converter software hmangin video format dangah thlâk kual lehin computer a chak vak loh phei chuan hun a duh êm êm a ni. Video play theih loh zînga common deuh ber chu Matroska file format (mkv) hi a ni awm e.

A mawlmang thei ang berin Matroska file chu - ZIP file pakhat chhûnga file chi hrang hrang kan dah ang deuh hian video file te, audio file te leh subtitle file te inzawmkhawm veka file (mkv) pakhata dahna kan ti thei awm e. Tun țumah hian hun reilote chhûngin mkv video, broadcast software in a play theih ngei tûrin mp4 format in kan ti danglam dâwn a ni. Computer chak țha pangngai ah chuan minute 5 emaw a aia reilo chhûngin a zawh hman vek a rinawm.

A hmasain software kan mamawh te:
1. MKVToolNix (16.9 mb) - http://go.lonelycowboy.in/mkvtoolnix
2. MKVExtractGUI-2 (1.04 mb) - http://go.lonelycowboy.in/mkvextract
3. My MP4Box GUI - (3.58 mb) - http://go.lonelycowboy.in/mymp4box

Step 1: Software no.1 leh no.3-na te khi kan install zawh hnuah software no.2 MKVExtractGUI2.exe file hi MKVToolNix kan install-na folder-ah kan va dah lût ve ang.

Step 2: MKVExtractGUI2.exe file kan hawng anga, chumi hnuah mkv video/movie kan pawt lût tawp ang. MKV video kan pawh luh azirin track hrang hrang, video track, audio track, subtitle track a rawn siam anga, track ho chu kan select vek hnuah Extract button kan click ang.

Step 3: MKV movie/video kan extract tur kha a frame rate (fps) kan hriat hmasak a ngai a, chumi hre tur chuan video kan right-click ang a, MediaInfo tih option-ah kalin frame rate kan chhinchhiah ang. MediaInfo option click tûr i hmuh loh chuan K-Lite Codec Pack i install dawn nia.

Step 4: My MP4Box GUI.exe kan hawng ve thung tawh anga, step 2-na a kan extract chhuah tâk file te kha kan pawt lût leh ang. FPS setting thlan tur a lo awm anga, step-3 naa frame rate kan chhinchhiah tâk kha kan thlang anga, chuan save-na tur location te kan thlan fel hnuah MUX tih kan click leh anga, tichuan reilote hnuah broadcast-na software pawhin a play theih turin mp4 video file a rawn siam chhuak mai dawn a ni.

A chunga kan sawi tâk step te khi kual viau angin lang mahse tih țhan chuan a awlsam êm êm a, computer chak țha tak ah phei chuan hun reilote chhûngin a zo nghal mai a ni. MKV file te hi video editing software tam zâwk ah hian lakluh theih loh a ni tlângpui a, editing tih nana hman duh pawhin tuna kan tih dân anga tih hian hun tam tak kan save awm e.

He tutorial hi video ang zawnga enduh tân youtube vid ka siam bawk e ;)
YouTube hmanga en chuan Subtitle/closed captions a ON theih bawk ania :P

September 18, 2017

Website a HTTPS:// install dan Part-III


Part-I leh Part-II angin i ti tawh a, SSL certificate te pawh install vek tawh siin engvangin nge browser address bar-ah tala lem hring  a la lan loh fo? Engvangin nge Secure a la intih ve loh? Chhan hrang hrang awm thei zînga langsâr ber chu mixed content vâng a ni.

Mixed content: Mixed content lo awm theih dân chu i secure web page-ah image, css leh scripts te http:// protocol hmangin load ta la, http hi a him miau loh avangin i secure page-ah chuan thil him lo i load tel ta tihna ania, thil him lo a tel na na chuan i page kha Secure Page a ni thei ta lo va, tichuan browser in i site chu secure angin a hmu thei ta lo va, a hnuaia picture a kan hmuh hian information siamin tala lem hring pawh a dah lang thei ta lo a ni.



Example-ah hian mixed content ka hmang a- cowboy lem (image) chu http hmangin website dang ami ka load daih avangin secure page a ni thei ta lo a ni. Hei hian image chauh ni lo, page chei nâna CSS kan hman te leh scripts kan load te a huam vek a ni.

A chunga kan sawi tâk mixed content khi kan website/web page-ah awm lo tûr chuan https:// protocol hmangin kan website content chu load vek a țha ber a, kan website pâwn ami image emaw scripts emaw kan hmang dâwn anih phei chuan kan copy-na tûr website kha secure website niin https:// an support ve ngei tur a ni. Example-a image ka hmanna tinypic.com pawh hi secure site anih loh avângin mixed content error ka neih phah a ni.

Kan website-ah post leh image te a lo tam tawh viau anih phei chuan mixed content hi siam țhat a buaithlâk duh phian thei a, a khawilai ber hi nge ka website ti secure lo tu tih i hriat duh chuan a hnuaia link ațang hian a check theih e.

 Why No Padlock?
https://www.whynopadlock.com/

Tin, website a kan software install (WordPress, Joomla etc.) azirin plugins a awm țeuh bawk a, chûng plugins hmang chuan content error tam zâwk hi chu awlsam tea siam țhat theih a ni. WordPress-ah chuan Really Simple SSL plugins te hi a lâr a, keichuan SSL Insecure Content Fixer plugins hi ka hmang thung. Software (CMS) kan hmang lêm lo anih pawhin a chunga kan sawi tâk ang khian kan HTML page-ah https:// protocol hmangin content load mai tur a ni.

Aw le, heti zawng hi SSL chungchânga ka ziah theih ni se, post hi i lo bengvârpui hlauh anih chuan khawngaihin a hnuaia facebook like button ka dah hi min lo LIKE sak dâwn nia, tichuan midang a la hre lo te paw'n an lo hre ve zêl ang a, Mizo te hi IT lamah kan lo bengvâr zual ve tulh tulh dawn nia!

September 14, 2017

Website a HTTPS:// install dan Part-II

Post hmasa zâwkah SSL certificate install dân kan sawi tawh a, kan install zawh tawh chuan a tâwk dêr tawh tihna a ni lova, site visitor ten https:// tih an type tel chauhvin secure site kha an hmu dawn tihna ania. Site visitor ten kan website an hawn huna https:// type chawp kher lova secure page a direct dân kan sawi leh dawn a ni.

Kan website-ah FTP software hmangin emaw hosting control panel-ah kan login ang a, Online File Manager hmangin home directory kan hawn hnu ah .htaccess file hi a awmsa chuan kan edit ang a, a awmsa loh chuan kan siam chawp ang. CMS (wordpress, joomla, opencart etc.) kan install chuan .htaccess file hi a awmsa ang a, a lang lemlo anih chuan file manager in a hide pawh a ni thei a, settings ațangin tihlan mai tûr.

.htaccess  file kan neisa lo anih chuan kan computer desktop emaw a rem rem ah right-click in 'New Text Document' kan siam ang a, rename dawn hunah .htaccess. (dot htaccess dot) tiin kan rename leh ang a, chuan kan open ang a, a hnuai ami khu kan copy paste hnuah kan website home directory htdocs emaw public_html emaw chhûngah kan upload leh ang.


RewriteEngine On
RewriteCond %{SERVER_PORT} 80
RewriteRule ^(.*)$ https://yourwebsite.com/$1 [R,L=301]

yourwebsite.com khi nangma website in i thlâk ang a, i save hnuah engkim a dik vek chuan i website visitor ten https:// an chhut kher ngai lovin i website secure page a inhawng char char tawh ang.
Website a HTTPS:// install dan Part-I

A hmasain HTTPS hi install chi pawh a ni lo va, kan hriatthiam tlân theih zâwk nana title khi siam mai chauh ka ni. Website nei kan pung zel a, a la pun belh zel bawk ang. Google chuan internet a data kal reng reng hi secure channel hmang veka kal turin a duh, chumi vâng chuan Chrome browser-ah te pawh website https:// protocol hmang lo ho chu Not Secure tiin a dah lang vung nghe nghe tih chrome hmang țhin ho chuan kan hria ang a. Nakin lawkah phei chuan website secure lo ho phei chu a hnuaia screenshot-a kan hmuh ang hian color sen ngatin Not secure a la inti kuau dawn a ni. Online shopping site kan nei anih a, kan website ah thil kan zuar anih phei chuan thil lei duh tu te tan kan website kha rin ngam a har tawh dawn a ni.


Example picture atâna ka hman mizostore hi a rin ngam loh tihna a ni chuang lova, payment page chu PayPal leh CCAvenue secure website-ah a lut leh daih tho.

Website space (hosting) kan leina azirin țhenkhatah chuan tuna SSL certificate kan install tûr ber hi an pe tel thei a, țhenkhat ah erawh man to deuhva lei a ngai thung ang. SSL certificate hi man to taka lei a  ngaih țhin avangin he tutorial a kan hmun tur ber Let's Encrypt hi an lo siam phah ta a, an ni hi SSL certificate issue tu niin mi tam tak donation (sum an neih loh vang ni lovin) hmanga siam a ni. An ni inpêkna avang hian khawvel pumah mi tam takin secure website kan lo neih ve theih phah a ni.

Web hosting zuartu tam zâwk te chuan Let's Encrypt hi an control panel-ah a thlawna install mai theih turin an dah tawh a, hosting sumdawng lian zual deuh deuh GoDaddy etc. te chuan sumdawnna thil anih miau avangin an control panel-ah SSL install-na hi hmuh tur a awm ve lo a ni Godaddy cPanel hosting-ah a awm leh si e. Hosting țhenkhat ah phei chuan install-na option hi an dah bo daih nghe nghe.

Aw le, a hmasa berin ZEROSSL website ah kan kal ang a, kan website address kan submit hnuah download tur file min lo pe ang a, chumi chu kan website a kan upload hnuah click tur min pe ang, kan click hnuah automatic vekin verification a inti ang a, engkim a dik chuan thla 3 chhûng atân FREE SSL Certificate hi min pe dawn a ni. Thla 3 a ral hnuah a thlawna renew leh theih a ni thung. File download tûr min pêk kha, kan control panel SSL setting-ah kan upload/install leh ang a, tichuan secure website kan nei va ta der tihna a ni mai. Step-by-step a sawi dawn chuan a thui dawn si a, video hmangin ka website pakhata ka install lai hi ka record ta zâwk mai a, min lo thlirsak dawn nia.



Next: PART-II

August 24, 2017

Facebook-ah rûl

Android application-ah Snake on Screen tih vêl a awm tih hre ve hek lo, ka ti ve chhin châk sia, Adobe After Effect hmangin ka siam chawp ve ringawt a. Rûl paih fai nan hian Keylight by the Foundry plugins hi ka hmang bawk. Min han thlir sak ve teh u :)

August 19, 2017

Facebook embed post

A hnuaia mi hi facebook a ka status a ni a, facebook embedded posts feature hmangin tah hian ka suan lût a ni. Embedded Posts hian HTML iframe a hman avangin duh anga customize theih erawh a ni lem lo thung. Hei bâkah hian embedded videos leh comments a awm bawk. Embed post hman dawn chuan kan status privacy hi public-ah set a ngai thung. Tin, status ringawt ni lo public a photos kan upload te pawh a embed theih bawk. La hre ngai lemlo tân facebook developer page-ah hian a chhiar theih e.



facebook embed post

August 5, 2017

WordPress leh SMTP
WordPress hi free & open-source content management system (CMS) ah chuan a lâr ber pâwl a ni awm e. Website lâr leh lian tak tak heng TechCrunch, Facebook NewsroomMicrosoft News Centre, Mozilla BlogBBC America, Sony Music, MTV News, Vogue India leh Walt Disney Company te pawh in WordPress hi an hmang hlawm a ni. He website software hi Mizo zîngah pawh hmân ațangin kan hmang fer fur tawh a, mi țhenkhat eng nge a nih hre chiah lo pawh in Wordpress.com hnuaiah blog kan nei fur awm e.

WordPress ah chuan default email (wordpress@kandomainhming.com) hmangin mail a thawn chhuak țhin a. Plugins țhenkhat hmangin a thawn chhuahna email address hi tih danglam theih mah se a châng chuan a lo dawng tu spam/junk email folder ah a lut țhin a ni. SPAM folder-a lut lo tûr chuan kan SMTP account hmangin mail hi thawn chhuak turin wordpress plugins hmangin a tih theih a. Amaherawhchu, web hosting kan leina azirin limit leh restriction an la siam leh zêl a, entirnan GoDaddy leh free web hosting provider ang chi te, chuvangin SMTP plugins install pawh ni ila awmzia a nei dawn lo a ni.

Tih dan hrang hrang ka google hnu a țha ta ber chu kan website, company emaw firm emaw hminga Gmail account siam a, gmail SMTP server hmanga email thawn chhuak tura tih a ni. Tichuan Gmail hmanga mail thawn chhuah anih chuan a lo dawngtu spam folder-ah ah lût tawh lovin inbox pangngai ah a lût thei tawh dâwn a ni. Gmail SMTP settings chu a hnuai ami ang hi a ni.


Gmail SMTP server address: smtp.gmail.com
Gmail SMTP username: gmail address (e.g. username@gmail.com)
Gmail SMTP password: gmail password
Gmail SMTP port (TLS): 587
Gmail SMTP port (SSL): 465
Gmail SMTP TLS/SSL required: yes
Gmail SMTP hmang chung pawh khian hosting țhenkhat (GoDaddy) ah chuan mail a la thawn chhuak thei lo cheu ang. Chutiang anih thung chuan SMTP hmang lovin Postman Plugins hmang hian mail a thawn chhuah tîr theih bawk. Postman hian Google OAuth 2.0 a hman avângin hosting lamin SMTP hi restrict mahse mail a thawn chhuak thei vek tho a. Mahse chumi tûr chuan postman plugins khi google-ah permission kan pêk hmasak phawt a ngai a. Plugins install hnuah khian a tih dân tur wizard a awm vek avângin sawi a ngai hran lo tûr ah ngai ila.

A tâwp han khaikhawm nan GoDaddy leh free hosting hman chuan SMTP restriction a awm țhin avângin Postman Plugins hmang hian WordPress mail thawn tîr tûr a ni. Tichuan, i website ațanga mail thawn chhuah rêng rêng chu spam anga kal lovin user, customer te inbox a thlêng zêl ang. Hosting pangngai BigRock angah te chuan postman hmang kher lo pawhin Easy WP SMTP plugins hmang te pawhin awlsam te a email thawn tîr theih a ni.
© 2014 - 2019 Lalsangpuia Ralte. Powered by Blogger.