Lawnli Kaubawi

May 25, 2019

Website leh Android app optimize dân

Tun ṭuma website leh android app tih chak leh tih têt (optimize) chungchang kan sawi tûrah hian technical leh details deuh entirnan web server manage dân leh content delivery network (CDN) hmanga tih dân ang chi te kan sawi hran dâwn lo va. Mi tu pawhin awlsam taka an tih theih dân tûr zâwkin sawi kan tum dâwn a ni.

Website leh android app-ah chuan a tlangpuiin thil awm ngei ngei a awm ṭhin a, chu chu a hmuh ti nuamtu leh cheitu milem (image) hi a ni. Chutianga milem leh thlalâk kan hman ṭhin te chu a size a len chuan website load chhûng a timuangin server bandwidth te a heh em em a, tin android lamah pawh apk size-te nasa takin a ti lian thei a, hei hi kan ngai pawimawh em em tûr a ni. Android development lam khawih ṭhin phei chuan in hria ang a, milem pakhat ringawt pawh android screen tê deuh te, lian deuh te, tablet ang chi te tân chi hrang hrang siam a ngaih châng a awm ṭhin hi, app hawn chiaha lang ṭhin splash screen kan hman phei chuan apk size a lian hma duh êm êm a ni.

Kan sawi tâk tlemte aṭang khian kan image hman tûr chu optimize anih phawt chuan kan website load chhûng a rei lo deuh sawt ang a, tin android lamah pawh apk size a tê sawt bawk ang. Image optimize nâna kan hman tûr ber hi online hmanga tih chi a ni a, chu chu TinyPNG a ni. TinyPNG hian PNG file format chauh ni lovin JPG/JPEG file pawh a support a. Tin, online hmang kher lovin Photoshop plugin an nei nghe nghe a, chu erawh $65 a lei ngâi a ni thung.

A hmasa berin website a kan image upload tûr emaw android lama image kan hman tûr chu Photoshop-ah kan hawng phawt ang a, kan duh anga kan chei leh resize hnuah Save as JPEG/PNG thlang lovin Save for Web tih kan thlang ang a, kan image chu background nei lo chi (transparent) anih lêm loh chuan JPEG kan thlang ang a, option-ah High emaw Very High kan thlang ang a tichuan kan save ang.


A dawt lehah chuan TinyPNG website kan hawng ang a, Photoshop aṭanga kan save chhuah tâk kha kan upload ang a. Tichuan TinyPNG chuan lo optimize-in mit fing tak pawhin a danglamna a hriat theih loh tûr khawpa quality ṭha siin image kan upload chu rawn ti têin a rawn siam chhuak dâwn a ni. TinyPNG hian image width leh height a khawih danglam lo tih hre bawk ila. Tichuan a rawn siam chhuah chu download-in kan hmanna tûr android app emaw website-ah emaw kan hmang thei tawh ang.

A hnuaia picture hi android app-a Splash Screen ami tûr a ni a, Photoshop-a design hnua TinyPNG hmanga han optimize tîr chuan 5 MB hû lawih ka save thei a, chu chu android app-ah ngat phei chuan a hlu êm êm tih kan hre tlâng awm e.


A chunga kan sawi tâk hi Facebook emaw Instagram emaw Photo Site dang a thlalâk kan post dâwn chuan tih kher a ngai hran lo va, a chhan chu Image Optimization technology hi an neisa deuh vek ti ila kan sawi sual tam âwm lo ve.

Aw le, khitianga image kan optimize a kan upload ṭhin chuan website chu a load chak deuh ang a, tin server space leh bandwidth te kan save thei dâwn tih kan hre tawh a. Mahse, "website emaw blog-ah image ka lo upload ṭeuh hman tawh si a" i ti a ni thei e. Website CMS (software) atân WordPress i hmang anih chuan TinyPNG bawk hian wordpress plugin free-a hman theih an nei lehzêl a. Chumi hmang chuan i image upload tawhsa te chu a hlâwmin i optimize thei bawk. Amaherawhchu, WordPress ni lo, blogger-te i hmang anih chuan tih dân a awm ka hre hran lo a. Site ṭhenkhatah chuan Blogger-a image kan upload te hi a in optimize-sa a, chuvangin image quality a chhe duh a. Image quality chhe lo tûr chuan PNG format anga save a upload ngâi ni tein an sawi bawk. Eng pawh ni se, blogger/blogspot te chu Google site an nih avangin space leh bandwidth tih vêl vênthâwn ngai a awm loh avangin lo dah ṭha ta ila, WordPress-ah bawk lût leh ang.

Kan sawi lan zuai TinyPNG WordPress plugin kha kan install chuan image kan upload thar apiang automatic-in an lo optimize zêl thei a. Tin, plugin kan install hmâa image kan lo upload tawh te pawh a hlâwmin a khawih thei kan tih tawh kha. Amaherawhchu, thla 1 chhûngin image 500 chiah kan optimize thei a, chuvangin plugin setting-ah kalin image a optimize tûr chin kan set ve a ngai a ni. Engmah set lova kan install tawp a, ni tin upload kan neih bawk si chuan an phal chin kan thleng vat ang tih a hlauhawm ve thei tho bawk. Keimah bîk chuan wordpress plugin hi ka hmang lêm lo va, mahse image ka upload hmain TinyPNG website-ah zâwk hian ka upload hmasa ngei ngei ṭhin thung. A hnuai ami hi TinyPNG wordpress plugin screenshot chu a ni.


TinyPNG online service ang chi hi website dang a awm nual a. Chutiang zînga ṭha leh langsâr zual deuh chu CompressPNG website hi a ni. CompressPNG hian a hranin CompressJPEG website an nei tho bawk. Anni hian ṭhatna pakhat an nei a, chu chu kan image upload chu an optimize hmâ leh hnu (before & after) an ti lang thei a, amaherawhchu wordpress plugin an nei ve lo thung.

TinyPNG plugin bâkah hian image optimization/compression plugins tam tak a awm a. A tlangpuiin image optimize theih zât nei an ni deuh vek a, mamawh dân azira account upgrade mai theih an ni hlawm. TinyPNG website (plugin lo zâwk) hi phal chin (limit) awm lova hman reng theih anih avang leh ka hman tam ber anih avangin tun ṭumah hian anni hi ka rawn thlûr bîk a ni a. Heta limit awm lo tih hian thla khata image 500 chin tih ka sawina kha a ni. Image size lian deuh entirnan thlalak 10 MB a lian ang chi te chu kan upload (optimize tîr) thei chuang lo va. Upload theih size hi 5 MB niin, a aia size lian kan upload duh chuan an website-ah in register in Premium account ($25/yr & 25 MB per upload) kan lei a ngai a ni. A tîr lama kan sawi tawh angin image 10 MB êm êm a lian upload tum kha chu a fuh ber lo a, Photoshop-ah resize hmasak phawt a, chumi hnua Save for Web anga save kha a finthlâk mai awm e. Aw le, heti chin hi TinyPNG chungchang bîk chu ni hrih phawt se, remchâng dangah website optimize dân chi dang sawi leh kan tum dawn nia.

Thanks for reading!

July 23, 2018

A hun a lo thleng ta! I secure ve tawh em?

Google chuan kum tîr lama an lo sawi lâwk tawh angin naktuk aṭang mai hian Chrome browser version thar, v.68 chin chung lamah website HTTPS protocol hmang lo te chu not secure tiin address bar-ah information a dah lang dawn ta. Google-in an ngaih pawimawh em em chhan chu a chunga milem aṭang hian a chiang mai awm e. Google blog emaw, wordpress.com blog emaw i neih chuan SSL certificate hi a free-in an pêk avangin buaina tur a awm hran awm lo ve. [Blogger custom domain-ah SSL (https) a hman ve theih ta]

Chrome will mark all HTTP sites as “not secure”
Ka article hmasa lam chhiar tawh chuan in hria ang a, Website a HTTPS:// install dan Part-3 thlengin ka ziak tawh a, chutah chuan Let's Encrypt Free SSL kan hmang nghe nghe a nih kha. Hriatzaunan, Google pawh hian an hnuaia blog siam te tan Let's Encrypt free ssl hi an hmang ve nghe nghe a ni. Let's Encrypt hi thla 3 ral hnuah renew zêl a ngaih avangin email check regular lo tân phei chuan renew theihnghilh a awl duh viau awm e. Amaherawhchu, mahniin web hosting te kan leia kan hmang anih chuan kan leina azirin cPanel settings-ah Let's Encrypt hi an dah tel thei a. An dah tel hlauh anih chuan thla 3 hnua renew chawp zêl ngai lovin automatic-in a in renew char char thei nghe nghe a. Amaherawhchu, hosting company tam zâwk hian a hranpaa SSL Certificate hi an zawrh tel ve zêl avangin Let's encrypt settings erawh a awm vek kherin a rinawm loh.

Pâwl, sumdawng emaw mimal emaw a duh tân chuan khitiang neuh neuha buai lo khian SSL Certificate hi leia website-ah install mai theih a ni a, SSL certificate hi a tlawm pâwl Rs.600/- aṭangin khîtah thlengin a awm awm e. Eng pawh ni sela, article danga kan sawi Let's Encrypt hmang tawh lovin CloudFlare hmangin a thlâwna SSL Certificate neih leh install dan i han sawi dawn teh ang.

GoDaddy hian SSL Certificate hi an zuar to reuh fu
A tawi zawngin SSL certificate kan neihna tur ber CloudFlare hi U.S. company pakhat an ni a, an ni hian website security leh website tih chak lam hi an thupui (service) ber a ni. CloudFlare Universal SSL kan hmang anih chuan Let's Encrypt te angin renew vêlah buai a ngai ve lo a, SSL certificate hi thla 6 chhûng a free in an issue phawt ang a, thla 6 hnuah automatic-in an renew leh ang.

CloudFlare website-ah in register in, ADD SITE tih aṭangin kan website kan add ang a, plan hrang hrang thlan tur lo awm zingah free plan kan thlang ang a, chumi hnuah cloudflare dashboard lo langin kan website IP te a rawn hmu ang a, a hnuaia screenshot ang hian kan website zâwnah orange color cloud sign a lo awm ang a, orange color (ON/enabled) ngei ani tih kan chian hnuah kan next ang. A dawt lehah kan website nameserver thlâk turin a rawn ti leh a, chumi chu website kan leina control panel lamah va thlâk tûr a ni. Nameserver chu eng nge a nih tih leh khawi settings aṭanga thlâk tur nge tih i hre lo anih pawhin website i leina ah khan help files chhiar tur a awm vek ang a, 24/7 support zawh tur pawh an awm hial mahna.
Website i add zawhah hemi hi a lo lang ang a, orange cloud sign khi ON tur a ni
nameserver hi i website leina control panel aṭangin i thlâk ang
Website i leina control panel lamah nameserver i thlâk tawh chuan 'Continue' i click ang a, cloudflare dashboard a lo lan hunah a chung menu aṭangin CRYPTO tih i thlang leh ang a, SSL option thlan tur ah FULL i thlang ang a, tichuan CloudFlare chuan SSL certificate thar a rawn issue ang a, SSL CERTIFICATE pawisa sen ngai miah lovin kan nei tihna a ni tawh mai. A hnuaia screenshot-a kan hmuh ang hian SSL certificate issue tur hian darkâr 24 nghah pawh a ngai thei e, amaherawhchu engkim a kal tluan chuan minute 5 chhûngin a zo hman vek awm e. Hemi process atana pawimawh pakhat chu cloudflare-in nameserver thlak tura a rawn tih khian continue click nghal mai lovin kan website leina control panel lamah nameserver hi va thlâk hmasak phawt a, chumi hnu minute hnih/khat-ah continue click chauh hian crypto process hi a ti rang a ni.


engkim a tluang anih chuan FREE SSL CERTIFICATE i nei ta der mai 😁
A chung screenshot ami ang hian CloudFlare Universal SSL i neih tawh a, Active Certificate a intih kuau tawh chuan i website chu a tirah https:// dahin han hawng chhin la, address bar-ah tala lem hring a lo lan kuau chuan thlamuang takin i awm thei tawh ang 😇. https:// inti siin tala lem hring a lan loh erawh chuan mixed content vâng a ni thei a, chumi chungchang chu Website a HTTPS:// install dan Part-III ah hian chhiar tur a awm e.

A tawp ber atan chuan i website chu SECURE a lo inti ve ta a, miin i website an tlawh khan HTTPS:// tih an type kher loh chuan secure website a ni tih an hre dawn lova, type chawp kher ngai lova ti tur chuan a chunga kan sawi lan tawh cloudflare CRYPTO settings-ah khan kal leh la, page hnuai lamah ALWAYS USE HTTPS tih a lo awm ang a, chumi chu ON tur a ni.


Aw le, heti zawng hi pawisa tam tak sen ngai lova SSL Certificate neih dan ka ziah theih chu ni mai se. (Example atana ka hman screenshot-ah khian ka rilrua lo lang hmasa ber vanglaini.org ka hmang a, vanglaini website ka add ve ringawt avang khian engti kawng mahin an website-ah buaina a va thlen lo a, website an leina control panel-ah ka va tih danglam theih miau loh avangin. Duh duh website cloudflare-ah hian a add theih tih hria ila a ṭha awm e 🙂)

Thanks for reading!



July 20, 2018

Line 1 chauh hmanga website chei dan

HTML hmangin website an siam ṭhin tih kan hria a, chung HTML code zinga meta tag pakhat theme-color tih hi kan hre ngai em? Hre ngai lovang, a chhan chu html meta tag pangngai a ni lova, Google in 2014 aṭangin anmahni mobile browser Chrome a hman atan chauhva an tih vang a ni.

He theme-color meta tag hian a tih danglam ber chu chrome browser-a link kan chhut luhna lai address bar/omnibox bâwr vel chu kan website color milin a ti danglam thei a ni. Tin, android status bar/notification bar color a khawih danglam bawk.

Chrome browser: theme-color meta tag in a tih danglam
Google Chrome-ah chauh hman theih, chu pawh android phone Lollipop chinah chiah lehnghal kan ti a ni thei e; wiki aṭanga a lan dan chuan tun thlengin Google Chrome hi khawvela hman tam ber anih miau avangin he theme-color meta tag hmanga website chei hi thil harsa a ni lo bawk nen a sualna em em a awm awm lo ve.

https://en.wikipedia.org/wiki/Usage_share_of_web_browsers
Aw le, kan website color emaw theme mila browser theme-color tidanglam ve tur chuan line 1 chiah kan mamawh a, chu chu a hnuaia mi hi a ni.

<meta name="theme-color" content="HEX_COLOR_CODE"/>
Example: <meta name="theme-color" content="#455EBE"/>

He theme-color meta tag hi kan <html></head> inkâr khawi laiah pawh kan dah ang a, tichuan mobile browser lamah rawng vâr tawp lang ṭhin aiah kan website color milin a lo danglam ve mai dawn a ni.

A hnuaia screenshot-a a lan dan ang hian www.jfdictionary.com website menu-ah rawng pâwl ka hmang nasa a, browser theme-color atan website mil turin rawng pâwl bawk ka thlang a, tihian a lo lang ta a ni.

before applying theme-color

after applying theme-color

A chunga kan sawi tak theme-color hi eng website (blogger, wordpress etc.) ah pawh a apply theih vek a. WordPress ah phei chuan awlsam tea apply-na tur plugin 'Meta Theme Color Colour' a awm nghe nghe. Thanks for reading!

June 13, 2018

Gmail: Confidential Email

April thla a Google in gmail design thar an tichhuah ah chuan confidential email a thawn theih tawh a. Thil ṭangkai leh ṭhat hmel tak angin lang mah se kei erawh chuan a hmanna tur ka hre tlem kher mai 😂

Gmail confidential mode-ah chuan email chu:
1. mi dang hnena forward theih a ni lo.
2. download theih a ni lo.
3. print theih a ni lo.
4. expiry date a set theih.
5. sms passcode hmanga hawn theih turin a tih theih.
6. hawn theih tawh loh turin access a remove leh theih.

Gmail design thar chu engtin nge ka hman ang?
He thu ziah lai hi chuan Computer-ah chiah a la hman theih a, mobile phone app-ah a la hman theih loh. Computer aṭang chuan gmail.com-ah kan login ang a, login hnuah Gmail design thar hi min rawn offer lo anih chuan Gear settings aṭangin 'Try the new Gmail' click mai tur a ni, tin, design thar hi kan duh lem lo anih pawhin classic gmail-ah a lêt leh theih bawk.


Confidential mode-a email thawn tûr chuan kan tih ṭhin dan pangngaiin compose-ah kan kal ang a, dialog box hnuaiah tâla leh sana lem inkawp a lo awm ang a, chu chu confidential mode chu a ni.


ZIP file-ah thil pawimawh dahin lo thawn tel dawn ta ila, vanduaithlak takin a theih ta loh tlat mai 👎


Confidential email kan thawn tur chu a expire hun atan ni 1 aṭanga kum 5 thlengin a thlan theih a, tin, email lo receive tuin sms passcode hmang khera a hawn theih turin a tih theih bawk. SMS passcode hmanga hawng tura kan duh chuan email kan thawnna tur phone number kan hriat a ngai thung.


Confidential email kan thawn chu a lo dawngtu in gmail app (latest update) aṭangin duh chuan a lo hawng thei tawh thung a. A lo dawngtu gmail ni lo, Yahoo mail-ah te confidential mail hi kan thawn anih chuan a lo dawng thei vek tho ang a, a chhunga awm en tur erawh chuan google account hmangin a sign-in leh tho a ngai ang.


Confidential email kan thawn chu expiry date kan set aia hmaa hawn theih tawh lo tura kan duh chuan access kan remove daih thei a, chutianga ti tur chuan kan email sent items-ah kalin confidential mail kan hawng ang a, remove access click mai tur a ni.


Heti zawng hi Gmail design thar te zinga pakhat confidential mode enchhinna chu a ni a, thu leh thlalak te copy theih loh, print theih loh, download theih loh mah se a screenshot theih vek tho avangin keimah bik chuan a hman ṭangkaina tur em em ka hre rih lo a ni. Thanks for reading!


March 31, 2018

Blogger custom domain-ah SSL (https) a hman ve theih ta

Blogger dashboard-ah ka lut chu HTTPS a hman theih tawh thu notification a lo awm reng mai a, blogger settings-ah kalin ka bihchian hnu chuan Google-ah custom domain hmang ho tân HTTPS a hman theih tawh thu announcement chhiar tur ka zawng nghal a, ka hmu lêm hlei lova! A enga pawh chu ni se Blogger hnuaia blog nei tan chuan HTTPS setting hi thil thar a ni hran lova, eng blog pawh https:// hmang hian a en theih vek a, settings-ah ON anih leh nih loh azirin a langin a lang lo mai mai chauh a ni. Custom Domain hmang ho tân chuan he settings hi ON na tur a awm ve ngai loh avangin hetia Blogger in an release ve tâkah chuan a lawmawm êm êm a ni.


Blogger in Custom Domain a tih chu kan website leichawp tihna a ni mai a, kan website leh blogger hnuaia kan blog thlunzawm anih chuan custom domain kan hmang tihna a ni. Entirnan tuna ka blog pawh hi a original address chu kaubawi.blogspot.in niin custom domain ka hman hnu chuan blog.lonelycowboy.in tih a lo ni ta ni. I blog chu thanga.blogspot.in lo ni ta se, custom domain hmangin www.thanga.com nen a thlunzawm daih theih a, hemi chungchang hi ka post hmasa berah ka sawi lang nghe nghe.

HTTPS chu engvangin nge a pawimawh êm êm? A tawi zawngin security lama a ṭhatna chu thuhran nise, Google search ranking atân a pawimawh a, Google-in http aiin https hi a dah pawimawh hmasa zâwk a ni.

Hetia sawi duah lo hian HTTPS setting chu a ON nghal pawp theih loh em ni? A chunga sawi lan tawh angin custom domain hmang lo tan chuan https hi blog siam tirh aṭangin a awmsa vek a, i blog address kha han en la, a tirah https:// a intih loh chuan lang lo turin a awm tihna mai chauh a ni. A lang lo anih chuan https setting i ON hmain chhiar zel phawt rawh.


I blog-ah post LIKE-na facebook button i dah anih chuan HTTPS setting i ON hnuah post likes tawh sa zawng zawng a bo vek ang!😱 (Hei keipawh a bo vek hi 😂) Hei hi a chhan chu facebook in 'post url' hmangin likes a chhinchhiah vâng a ni a, https ON hnu chuan a facebook in likes a lo chhinchhiahna url hlui http://blog.lonelycowboy.in leh thar https://blog.lonelycowboy.in a inan tâk loh vâng a ni.

Tin, https i ON anih chuan i blog/custom domain chu Google bot i index (chhinchhiah) ṭhat tir leh vek a ngai bawk ang! Hei hi a ngai ngei ngei e tihna a ni lova, google search results lo lang ah i blog address hlui lang lo tura i duh chuan index ṭhat tir hi a pawimawh a, custom domain hman phei chuan search ranking tih sân nan te a pawimawh lehzual awm e.

Google bot index ṭhat tir tur hian Google Webmaster Tools (https://www.google.com/webmasters/) ah login in kan website chu submit tur a ni. Submit dan vêl hi chu sawi si se lo ta ila a hnuaia link aṭang khuan a chhiar theih e. Tikhan HTTPS i hman duh leh duh lo chu i thu thu a ni e. 😙

Chhiar peih tân: Ask Google to recrawl your URLs

© 2014 - 2019 Lalsangpuia Ralte. Powered by Blogger.