TV Programme set thin tute tan computer tip - Lawnli Kaubawi

December 5, 2016

TV Programme set thin tute tan computer tip


Mizoram khaw tin deuh thaw ah Local Cable TV Operator kan awm ta. A țhen chuan Local Channel te neiin film leh programme chi hrang hrang te kan chhuah (playback/broadcast) țhin a. Chutiang programme te chhuah nân chuan Broadcast Software chi hrang hrang kan hmang fur awm e. Tuna kan sawi tur hi chutiang broadcast software hmanga TV programme set țhin tute leh Microsoft Windows OS ngei hmang tute tân deuh bîk a ni.

TV programme kan set chuan kan thil chhuah tur video sei zâwng (duration) kan hriat chian a pawimawhzia kan hria ang a, video duration hrechiang lova kan set tawp tawp chuan programme a mumal dawn lovin a châng leh film a chhuah tâwp hmain film dang a lo ințan ang a, a châng leh channel logo animation clip (montaz) te emaw a kal nawn tlut tlut țhin ang. Chumi pumpelh tur chuan kan programme set tur video duration hi a minute leh seconds nên lam fimkhur taka duan (set) a ngai țhin a ni. Network lian tak tak HBO, Star TV-te emaw broadcast software leh an tihdan erawh kan hriatloh rualin an ni chu lo dahțha ta ila.

Mizo video editor-te uluk leh taima êm êm an awm laiin țhenkhat erawh edit puat a, a chhuahleh (playback) na tur lam device/hardware... TV Channel emaw, screen projector emaw, DVD/VCD player emaw flat TV emaw lam ngaihtuah zui tawh miahlo an awm țhin. Chutiang hriatloh vâng emaw uluk loh avâng chuan TV programme lo set-tu in harsatna tam tak a tawh phah thei a ni. Entirnan, video editor pakhatin advertisement clip a edit sei zâwng (duration) chu minute 1 leh seconds 10 lo ni ta ang se, programme lo set-tu (schedule-tu) chuan minute 2 a tlin lohna seconds 50 la bâng zawng khi clip dangin a hnawhkhah a lo ngai ta a, seconds 50 lek clip dang a zawn a lo ngai ta a ni. A tlângpuiin local-ah chuan advertisement clip duration hi 30 emaw 60 secs a ni tur a ni pawh lo ti ila, a chunga kan sawi ang editor zawmthaw deuh ho khi chuan an edit pêl tlângpui leh nge nge țhin.

Advertisement clip chauh lovah pawh music videos emaw film emaw pawh lo nise, playback dâwnin duration laklawh deuh deuh a tam țhin. Broadcast software kan hman azirin software changkâng deuh chuan timing laklawh deuh te chu lo adjust thei tho mahse software țhenkhat ah erawh a theih ve loh ang a, chutiang hunah chuan computer-a video clip kan neih zawng zawng sei zâwng (duration), eng ang file format nge a nih (mp4 nge avi etc.), video frame size len zâwng te nên lama awmze nei taka inremkhâwm tîr (organize) dân 'Windows Search' hmangin i han sawi dâwn teh ang.

A hmasa berin My Computer kan hawng ang a, navigation bar-a search-na laiah a hnuaia mi ang hi kan chhû ang (keyboard shortcut: F3):
kind:video
tikhian computer-a video clip awm zawng zawng a lo lang ang a, duration sei deuh emaw tawi deuh emaw kan duh chuan 'length' tih hi kan chhut belh leh ang a, option thlan tur very short, short, medium, long, very long tih te a rawn pe ang:
kind:video length:medium
Video hrang hrang a rawn zawng hmu țeuh ang a, a duration zât dik tak erawh a lang nghâl lo thung ang. Chumi tilang tur chuan Menu bar hnuaia Size, Folder tih vêl awmna laiah kan right-click ang a, More... tihah kal lehin 'Length' tih hi kan zuk select chhuak ang a, tichuan videos ho duration dik tak chu a lo lang tuarh tawh ang. Tichuan 'length' tih a lo lan tawh hnua 'Length' tihlai kan click chuan video sei zâwng a tawi ber ațanga a sei ber emaw, video sei ber ațanga a tawi dân indawtin a inthlâk thleng thei bawk ang.

Tikhian video duration chu kan hrethei ta a, video format hrang hrang avi, mpg, mp4, mkv, flv etc. te a hmu țeuh ang a, broadcast software-in AVI emaw MP4 chauh emaw lo play thei ta ang se... search-na ah khan 'type' tih kan chhut belh leh anga, tichuan kan duh ber mp4 chauh emaw kan tichhuak (filter) leh thei ang:
kind:video length:medium type:mp4
 Tin HD videos ho chauh kan zawn chhuah duh pawn frame width emaw height hmangin kan la zawng chhuak thei cheu bawk:
kind:video length:medium framewidth:1280

Full HD videos zawn duh pawhin:
kind:video length:medium framewidth:1920 frameheight:1080
 Tikhian computer-a videos awm ho chu awlsam tein kan thliar zung zung thei ta a, TV programme schedule tur video clip thlan chungchangah a puih ngei che ka beisei.

6 comments:

  1. Hei hi android tan theih ve em...ka tih awm zia...chu app hmanga live streaming tih na tur a hman theih tur ang ten,?

    Chuan post hi kan blog lam ah suan phei ve i phal em?

    ReplyDelete
  2. This comment has been removed by the author.

    ReplyDelete
  3. Mi bon maww..hei Kapu I blog hi lo tlawh ve fo a ngaih hmel , a fin thlak thin teh e.

    ReplyDelete
  4. This comment has been removed by the author.

    ReplyDelete

© 2014 - 2017 Lalsangpuia Ralte. Powered by Blogger.